നന്ദിയും കടപ്പാടും : ആരോട് എന്തിന്?

 

സിംഹവും എലിയും

സിംഹത്തിന്റെയും എലിയുടെയും കഥ കേൾക്കാത്ത ആരും തന്നെ കാണില്ല. മുത്തശ്ശി പറഞ്ഞ  പൊടിപ്പും തൊങ്ങലും  നിറഞ്ഞ അനേകം കഥകളിൽ ഒരു കഥ !

ഉറങ്ങികിടന്ന സിംഹത്തിന്റെ മുകളിൽ വീണിട്ട്  ജീവനുവേണ്ടി യാചിക്കുന്ന എലിയേയും, പരിഹാസത്തോടെങ്കിലും, ദയ കാണിക്കുന്ന സിംഹത്തിനേയും നമ്മുക്ക് അറിയാം. പിന്നെ വലയിൽ കുടങ്ങി ജീവരക്ഷക്കായി നിലവിളിക്കുന്ന സിംഹത്തേയും, നിലവിളി കേട്ട് ഓടിവന്നു സഹായിക്കുന്ന എലിയേയും അറിയാത്തവരില്ല.

അതു പോലെ അതികായകൻമാരായ സിംഹങ്ങളെയും അവരുടെ ദയ കൊണ്ട് രക്ഷപ്പെടുന്ന എലികളെയും, പിന്നെ സിംഹങ്ങൾക്കു താങ്ങും തണലും ആയി വളരുന്ന എലികളെയും നമുക്ക് പരിചയം കാണും! ഒന്നു സൂക്ഷിച്ചു നോക്കിയാൽ നാം തന്നെ സിംഹമോ എലിയോ ഒക്കെ ആയ സന്ദർഭങ്ങളും കാണുവാനും ഒരു പക്ഷേ സാധിച്ചേക്കാം.

നന്ദിയോ കടപ്പാടോ?

ഈ കഥയിലെ എലി കാണിച്ചത് നന്ദി ആയിരുന്നോ അതോ കടപ്പാടായിരുന്നോ?ഒരു പക്ഷേ ഈ ചോദ്യം തന്നെ അസ്ഥാനത്താണ് എന്ന് പലരും വിചാരിക്കുന്നുണ്ടാകും. നന്ദിയും കടപ്പാടും തമ്മിൽ എന്തു വ്യത്യാസം?

കിട്ടിയ ഉപകാരങ്ങൾക്ക് എല്ലാം അതുപോലെ തന്നെ പ്രത്യുപകാരം ചെയ്യണം എന്ന് ബാല്യകാലം മുതൽ മനപാഠം ആക്കിയവരാണ് നമ്മളിൽ ഒട്ടു മിക്കവരും. ആ ചിന്താഗതി വച്ചു നോക്കിയാൽ, കിട്ടിയ ഉപകാരങ്ങൾ എല്ലാം വീട്ടേണ്ട കടങ്ങൾ മാത്രമായേ കാണാൻ സാധിക്കുകയുള്ളൂ.  അങ്ങനെ ഉള്ള ചട്ടകൂട്ടിൽ, മനുഷ്യ ബന്ധങ്ങൾ ഇടപാടുകളുടെ പരമ്പര മാത്രo ആയി തീരുന്നു. കടപ്പാടുകളിലൂടെ മാത്രം ഉടലെടുത്ത ബന്ധം, കേവലം കടം വീടുന്നതുവരെ മാത്രമേ ഉള്ളൂ. കടം കൊടുത്തവരും വാങ്ങിയവരും തമ്മിലുള്ള  ബന്ധം കടം തീരുന്നതോടെ അവസാനിക്കുന്നു. അങ്ങനെ ഉള്ള വ്യക്തി ബന്ധങ്ങളിൽ, നന്ദി എന്ന വികാരത്തിന് സാദ്ധ്യത നന്നേ കുറയുന്നു.

നന്ദി കടപ്പാടല്ല. രണ്ടു വ്യക്തികൾ തമ്മിൽ ഉള്ള ആത്മബന്ധമാണ്. അത് ഒരു ഉപകാരത്തിലോ പ്രത്യുപകാരത്തിലോ ഒതുങ്ങുന്നതല്ല. നന്ദി, സ്നേഹം പോലെ ഒരു വികാരമാണ്. കൊടുക്കുവാനോ വാങ്ങുവാനോ സാധിക്കുന്നതല്ല, മറിച്ചു അനുഭവിച്ച് മാത്രം അറിയണ്ടതാണ്. ഒരു പക്ഷേ സ്നേഹത്തിൻറെ തന്നെ വേറെ ഒരു ഭാവമാണ് നന്ദി, ഓരോ വ്യക്തിയുടെയും മനസ്സിൻറെ നന്മയുടെ പ്രതീകം. സ്നേഹവും നന്ദിയും എങ്ങനെ  പ്രകടിപ്പിക്കണം എന്നുള്ളതു്തി കച്ചും വ്യക്തിപരമായ തീരുമാനമാണ്.

നന്ദി ആരോട്

ആരെങ്കിലും നമുക്ക് വേണ്ടി ചെയ്യുന്ന നല്ല പ്രവർത്തികൾക്ക് വേണ്ടിയോ, അല്ലെങ്കിൽ പറയുന്ന നല്ല വാക്കുകൾക്ക് വേണ്ടിയോ ആണ് നാം സാധാരണ നന്ദി കാണിക്കുന്നതു്. ഇത് നന്ദിയുടെ അപൂർണ രൂപം ആകുന്നു. നമ്മുടെ സ്നേഹിതരും ഉറ്റവരും നമ്മേയും നമ്മളുടെ ഏതു കുറവുകളേയും സഹിക്കുന്നവരാണ്. അതുകൊണ്ട് തന്നെ അവർ ആരും സാധാരണയായി അതൊന്നും ചൂണ്ടി കാണിക്കാറുമില്ല. പക്ഷേ മറ്റുള്ളവർ അങ്ങനെ ആകണമെന്നില്ല. ഒട്ടു മിക്കവരും നിസംഗതയോടെ ആയിരിക്കും നമ്മേ വീക്ഷിക്കുന്നത്. പക്ഷേ നമ്മുടെ ശത്രുക്കൾ അങ്ങനെ അല്ല.

നമ്മളെ ദുഷിക്കാനും, നമ്മൾക്ക് പ്രയാസങ്ങൾ ഉണ്ടാക്കുവാനും, പ്രതിസന്ധികൾ സൃഷ്ടിക്കുവാനും ഈക്കൂട്ടർ സദാ ശ്രമിക്കുന്നവരാണ്. നമ്മളുടെ തെറ്റുകളും കുറ്റങ്ങളും കുറവുകളും ഏറ്റവും നന്ദായി മറ്റുള്ളവർക്കും അതുപോലെ തന്നെ നമ്മൾക്കും കാണിച്ച് തരുന്നത് ഇവർ തന്നെ അല്ലേ? അതിലൂടെ നമ്മുടെ കഴിവും കഴിവുകുറവും നമ്മുക്ക് പരിചയപ്പെടുത്തുന്നതും  ഇവരല്ലേ? നമ്മളുടെ ജീവിതത്തിൻറെ ദിശ പോലും തീരുമാനിക്കാൻ ഉറ്റവരേക്കാളും ഇവരാണ് സഹായിക്കുന്നതു്. എങ്ങനെ നോക്കിയാലും,  നമ്മുടെ ജീവിതത്തിൽ ഇവരുടെ പ്രഭാവം ഒട്ടും കുറവല്ല.   അങ്ങനെയുള്ളവർ നമ്മളുടെ നന്ദി അർഹിക്കുന്നില്ലേ? അവരും നന്ദിക്ക് അർഹരാണ്!

ഇത്തരക്കാരെ  നാം ശത്രുക്കളായി ആണ് സാധാരണ കാണുന്നതു്. അത് കൊണ്ടാണ്  അവരോട് നന്ദി കാണിക്കാൻ നമ്മൾ പ്രയാസപ്പെടുന്നത്. നന്ദിക്കും നിന്ദക്കും തമ്മിൽ ഉള്ള വിത്യാസം നമ്മുടെ കാഴ്ചപ്പാട് മാത്രമാണ്.

പ്രതീക്ഷാ ഭംഗം

നമ്മൾ ആരോടെങ്കിലും സഹായം ചോദിക്കുമ്പോൾ അവരിൽ നിന്നും എന്ത് കിട്ടും അല്ലെങ്കിൽ കിട്ടണം എന്ന് കണക്കു കൂട്ടിയിട്ടാണ് ചെയ്യാറുള്ളത്. പലരും സഹായം ചോദിക്കാൻ മടിക്കുന്നവരാണ്. പക്ഷേ,  ചോദിക്കാതെ സഹായം പ്രതീക്ഷിക്കുന്നവരുമാണ്. ചോദിച്ചിട്ടാണെങ്കിലും അല്ലെങ്കിലും, പ്രതീക്ഷയ്ക്കു ഒപ്പം ഉയരാൻ അവർക്ക് കഴിഞ്ഞില്ലെങ്കിൽ നമുക്ക് അവരോട് നന്ദി കാണിക്കാൻ പ്രയാസമുണ്ടാകും. അവർ തന്നതിലുപരി, തരാത്തതിനെപ്പറ്റി ആയിരിക്കാം നമ്മൾ കൂടുതൽ വ്യാകുലപ്പെടുന്നത്. അവരുടെ പ്രയാസങ്ങളെ പറ്റിയോ, അവരുടെ അവസ്ഥയുടെ യാത്ഥാർത്ത്യങ്ങളെ പറ്റിയോ നാം ചിന്തിക്കാറില്ല. ചിന്തിച്ചാലും അത് നമ്മുടെ കണക്ക് കൂട്ടലുകൾ മാത്രം ആയിരിക്കും.

കിട്ടുന്നതെല്ലാം പ്രതീക്ക്ഷിച്ചതുമായി  താരതമ്യം ചെയ്തു തുടങ്ങിയാൽ  ഒരു പക്ഷേ ഒട്ടു മിക്കതും പ്രതീക്ഷാ ഭംഗങ്ങൾ തന്നെ ആകാനാണ് സാദ്ധ്യത. അത് സ്വഭാവം ആക്കി മാറ്റുന്നവർ നന്ദി കാണിക്കുവാൻ കഴിവില്ലാത്തവരായി മാറും.  നമ്മുടെ സമൂഹത്തിൽ ഇങ്ങനെയുള്ളവർ വളരെ അധികം ഉണ്ട്. സമാധാനവും സന്തോഷവും ഇവരുടെ ഏഴയലത്തുപോലും വസിക്കുവാൻ വരുകയില്ല.

നന്ദി എന്ന നിക്ഷേപം

നന്ദി, മനോഹരമായ ഒരു മാനസികാവസ്ഥ ആണ്. വിതയ്ക്കുന്നതിലും വളരെയധികം കൊയ്യുവാൻ സാധിക്കുന്ന ഒരു നിക്ഷേപം. എന്തിനും മുതൽ മുടക്കും ലാഭവും  കണക്കു കൂട്ടി നോക്കുന്ന ഒരു സമൂഹത്തിൽ നന്ദി എന്ന ലളിത നിക്ഷേപം എന്തു കൊണ്ട് മനുഷ്യൻ കാണുന്നില്ല?

നന്ദി  എന്ന സ്വഭാവ ഗുണം ജന്മനാ കിട്ടിയിട്ടിലെങ്കിലും സ്വയം വളർത്തുവാൻ സാധിക്കുന്നതാണ്. ജീവിതത്തിൽ സമാധാനവും സന്തോഷവും വേണമെങ്കിൽ നന്ദി എന്നെയൊരു സ്വഭാവം വളർത്താൻ ആദ്യം ശ്രമിക്കുക.